جیسا کہ میں نے اپنے پہلے کالم میں لکھاتھا کہ زرعی ٹیکس لگاکر بہت حد تک معیشت کو بہتر کیاجاسکتا ہے بلکہ اس میں زندگی کی ایک نئی لہرپیدا ہوسکتی ہے لیکن طاقتور اور بااثر طبقہ ایسا ہونے دے گا۔؟ چنانچہ آئی ایم ایف اور دیگر عالمی مالیاتی اداروں سے قرضہ لے کر حکومت کے حالات چلائے جائیں گے جیسا کہ گزشتہ کئی سالوں سے ہورہاہے لیکن اس مرتبہ آئی ایم ایف اتنی آسانی سے قرضہ نہیں دے گا بلکہ میری معلومات کے مطابق انتہائی سخت اور اذیت ناک شرائط عائد کرکے پاکستان کوقرضے لینے پرمجبور کرے گا۔دراصل جو لوگ پاکستان پر حکمرانی کررہے ہیں ان کا نہ کوئی ویژن ہے اور نہ کوئی حکمت عملی جس پر عمل پیرا ہوکر پاکستان کو اپنے پیروں پر کھڑا کیاجاسکتاہے۔ حکومت کرنے والوں کے پاس سوائے پی ٹی آئی پر تنقید کرنے کے کچھ نہیں ہے۔ ابھی حال ہی میں پی ٹی آئی پر الزام لگایا گیا کہ اس نے یورپی یونین کو ایک خط لکھاہے کہ جی ایس پی پلس پر نظرثانی کرنے کی استدعا کی تھی لیکن جی ایس پی پلس کے ایک ترجمان نے کہاہے کہ ہمیں پی ٹی آئی کی طرف سے ایسا کوئی خط نہیں ملاہے۔ نیز جی ایس پی2014 سے پاکستان کی ایکسپورٹ بڑھانے کیلئے کام کررہاہے اور مدد بھی کررہاہے۔ اس ادارے کا پاکستان کی سیاست سے کوئی لینا دینا نہیں ہے۔ میرے خیال کے مطابق اتحادی جماعتوں کے چند چاپلوس عناصراس قسم کے بیانات دے کر ملک میں باہمی اتحاد کی کوششوں کو سبوتاژ کرناچاہتے ہیں حالانکہ اس وقت پاکستان کے سیاسی ومعاشی حالات کی درستگی کیلئے سب کو مل جل کر کام کرنے کی اشد ضرورت ہے۔ یہ احساس ہر پاکستانی کے دل ودماغ میں جاگزیں لیکن یہ نیک تمنائیں پوری ہوتی نظرنہیں آرہی ہیں۔ جوآنے والے دنوں میں پاکستان اور اس کے عوام کیلئے سکون کا باعث بن سکیں بلکہ حالات بتارہے ہیں کہ عوام کی زندگی میں مزید مشکلات پیدا ہونگی ۔ دراصل ہم سب میں خود احتسابی کا جذبہ مفقود ہوچکاہےحالانکہ خود احتسابی کاعمل اختیار کرنے سے جہاں غلطیاں اور کوتاہیاں دور کی جاسکتی ہیں وہیں ایک نئی سوچ بھی جنم لیتی ہے جو ملک کو ترقی کی طرف گامزن کرنے کا موجب بنتی ہے لیکن کون اس راہ سے گزرتاہے۔ وہ یونہی انتظار کرتاہے؟ ذرا سوچیے!