ہم آج کی اس نشست میں زندگی کے ان مثبت اور منفی پہلوو'ں کا جائزہ لینے کی کوشش کرتے ہیں کہ ہمارے نزدیک کے مستقبل کو انسان ہی کی تخلیق کردہ مصنوعی ذہانت ششدر اور حیران کن حد تک کس طرح تبدیل کر دے گی۔ زندگی کے درخشاں پہلوئوں کے اعتبار سے مصنوعی ذہانت کسی نعمت اور رحمت خداوندی سے کم نہیں ہے کہ مصنوعی ذہانت کی عین تشخیص حفظان صحت اور ادویہ کے شعبے میں ایک ایسا انقلاب برپا کر دے گی کہ اس کے ذریعے انسانی جینیٹکس کا تجزیہ ہو سکے گا، ماحول، علاج، ڈیجیٹل تھیراپی اور انداز زندگی کے اعداد و شمار کا احاطہ کیا جا سکے گا، حتی کہ بیماری اور برائی وغیرہ سے پاک ’’پرفیکٹ بیبیز‘‘ پیدا ہونے لگیں گے جس سے انسانوں کی انفرادی اور اجتماعی زندگیوں میں صحت اور لمبی زندگی کا دورانیہ بڑھ جائے گا۔ زمینی سفر کے حوالے سے پیش گوئیاں کی جا رہی ہیں کہ انٹرنیٹ اور الگورتھم کے کمالات سے 2035 ء تک 70 فیصد گاڑیاں انسانی ڈرائیورز کے بغیر چلنے لگیں گی، یہاں تک کہ مصنوعی ذہانت سے لیس بائیکس اور کاریں وغیرہ صلاحیت، ادراک، مشاہدے، پیش گوئی اور کارکردگی کے اعتبار سے حقیقی انسانی ذہانت کو اتنا پیچھے چھوڑ دیں گی کہ سفر حادثات سے کافی حد تک محفوظ ہو جائے گا۔ اس کے برعکس زندگی کے تاریک پہلوئوں کے حوالے سے مصنوعی ذہانت کے بہت سے منفی اثرات بھی موجود ہیں کہ اس سے اخلاقیات کے تباہ ہونے کے بھی واضح امکانات موجود ہیں جس سے الگورتھم کے غیرضروری اور نامناسب استعمال سے ’’اکاونٹیبلٹی‘‘ اور ’’لائف پرائیویسی‘‘ ختم ہو کر رہ جائے گی، انسانوں میں تعصب اور منافقت بڑھ جائے گی، خریدوفروخت، تجارت، فیصلہ سازی اور جرائم کے خلاف عدالتی نظام تباہ ہو کر رہ جائے گا۔ اسی طرح آرٹیفیشئل انٹیلی جنس کی مزید ترقی اور زیادہ استعمال سے روزگار کے اصولوں پر منفی اثر پڑے گا اور دنیا میں بے روزگاری کا ایک سیلاب آ جائے گا جبکہ نئے ذرائع کی عدم دریافت اور مین پاور کے اضافے سے دنیا میں دولت کے ارتکاز میں اضافہ ہو گا اور حسد و نفرت کے بڑھ جانے کی وجہ سے دنیا میں شدت پسندی اور امن و امان کا مسئلہ پیدا ہو گا۔ خیر اور شر کے حوالوں سے انسان کی زندگی میں یہ مصنوعی ذہانت کے ایسے امکانی پہلو ہیں کہ جن میں توازان پیدا کرنے کے لئے دنیا کو ابھی سے سوچ بچار کرنی چایئے۔ افراط و تفریط زندگی کی بقا کے لئے زہر قاتل ہے۔ ہم مصنوعی ذہانت کے ذریعے ایک مشین میں داخل ہو کر چند سیکنڈوں میں لاکھوں، کروڑوں اور اربوں میل کے فاصلے پر موجود کسی ستارے کی سطح پر تو اتر سکتے ہیں مگر یہ مفروضی آرٹیفیشئل انٹیلی جنس جب ہمارے بیالوجیکل عقل و شعور کو مکمل طور پر عبور کرے گی تو خود ہماری زندگی ہی خطرے سے دوچار ہو جائے گی۔ یہ بڑھتی ہوئی مصنوعی ذہانت کے بارے ایسے امکانی سوالات ہیں جن سے ہمیں آنے والے کل واسطہ پڑنے والا ہے۔ انسان کا محفوظ اور پائیدار مستقبل انسانی اقدار و ہمدردی، فلسفیانہ مکالمے اور معیاری دانش و حکمت پر استوار ہوتا ہے۔ ہماری بدقسمتی یہ ہے کہ ہمارے ہاں ایسے سوالات کے بارے سوچنے اور ان کے معقول جوابات یا حل ڈھونڈنے والا ابھی کوئی طبقہ پیدا ہی نہیں ہوا ہے۔