قاہرہ شہر جب آباد کرنے کا خیال پیدا ہواحکمرانوں کے ہاں تو فیصلہ ہوا نجومیوں سے مشاورت کے بعد کہ اس کی بنیادیں ’’سعد‘‘ وقت میں اٹھائی جائیں گی چنانچہ نجومیوں کی مشاورت سے جہاں جہاں سنگ بنیاد رکھا جانا تھا لمبی لمبی رسیاں لٹا دی گئیں‘ بانسوں سے باندھ کر ‘ سب تیاری مکمل تھی حکمران نجومیوں کے سعد وقت بتانے کے اعلان کا انتظار کررہے تھے۔ رسیوں کے ساتھ گھنٹیاں باندھی جاچکی تھیں کہ اچانک ایک بڑا سا پرندہ آکر اس کی اوپر بیٹھ گیا جس سے ساری گھنٹیاں بج اٹھیں لہٰذا ہدایات کی روشنی میں معماروں نے فوراً بنیادیں رکھ دیں۔ جب ایسا ہو رہا تھا تو نجومی چیخ رہے تھے کہ حضور یہ تو بہت منحوس اور سخت وقت ہے جس میں بنیادیں رکھی جارہی تھیں اگرچہ بنیادیں تو رکھی جاچکی تھیں۔ چونکہ نجومی اس معاملے پر ’’القاہرہ‘ القاہرہ‘‘ کہہ رہے تھے کہ ’’بہت سخت وقت‘ بہت سخت وقت‘‘ لہٰذا بنیادیں مکمل ہوتے ہی اس نئے شہر کانام ازخود القاہرہ ہوگیا۔ تب سے آج تک یہ القاہرہ جو مصری دارالخلافہ ہے بہت ہی سخت ‘ المیہ واقعات‘ مشاہدات دنیا کے سامنے لاچکا ہے۔ جس شہر کی بنیادیں ہی بقول مصری نجومیوں کے بہت سخت وقت میں اٹھ گئی ہوں وہاں کے پتھر دل حکمران ثابت ہوئے، پتھر دل فیصلے ہوئے۔جن میں حسن البنا اور سید قطب جیسے صالحین کو عملی سیاست و اقتدار سیاست کے سبب شہادتوں اور پھانسیوں پرسے گزرنا پڑا۔ تب سے صالحین کو اپنی اپنی کربلا سے گزرنا پڑتا ہے، یہ سلسلہ آج بھی جاری ہے۔ جنرل جمال عبدالناصر اور جنرل نجیب سوڈانی کی انقلاب کہانی گزشتہ نشست میں بیان کرچکا ہوں۔ آج یہ بات الم نشرح ہوچکی ہے کہ یہ انقلاب محض مصری فوج کی اپنی سوچ نہیں تھی بلکہ کچھ قوم پرستانہ جہاں سوچ کچھ تھی وہاں امریکہ ، روس (سوویت یونین) بھی اس میں متوجہ تھے، ہاں جنرل نجیب سے انقلاب کو جنرل جمال عبدالناصر کی طرف منتقل کرنےکا عمل تو واضح طور پر سوویت کمیونزم نے کروایا تھا کہ جنرل جمال عبدالناصر کمیونسٹ قوم پرست، فرعونی اولاد ہونے پر فخر کرنے والا تھا جبکہ جنرل نجیب سوڈانی، اخوان کے ہاں پسندیدہ تھا جیسا کہ جنرل عبدالفتاح السیسی صدر محمد مرسی اخوانی کے ہاں مقبول و معروف تھا۔ حسن البناء اور سید قطب وغیرہ جیسے د ین کے نام لیوا سیاستدانوں پر جو عذاب نازل ہوا اب روز روشن کی طرح عیاں ہے کہ یہ ماسکو کی خواہش پر ہوا۔ کمیونزم چونکہ دین و مذہب دشمن تھا لہٰذا حسن البناء اور سید قطب کو پہلے گرفتار کیاگیا پھر شہید کیا گیا۔ سید قطب پہلے طویل مدت تک گرفتار ہوکر جیل میں رہے۔ انہوں نے تفسیر فی ظلال القرآن کے آخری پندرہ پاروں کی تفسیر جیل ہی میں لکھی۔ سید مودودی نے بھی تفہیم القرآن پر نظرثانی کا کام جیل ہی میں کیا تھا۔ عراقی حکمرانوں نے مصری حکومت پر دبائو ڈالا تو سید قطب کو رہا کرکے عراق بھیج دیا گیا مگر ماسکو کے سخت دبائو پر دوبارہ سید قطب مصر واپس لائےگئے اورجیل میں ڈالے گئے۔ یہ گرفتاری دوسری بار1965 ء میں ہوئی جبکہ پہلی گرفتاری1954 ء میں ہوئی جو1964 ء تک رہی۔ انہیں1966 ء میں پھانسی دے کر شہید کر دیا گیا۔ صدر مرسی کو اقتدار سے باہر نکلوانے اور فوج کو اقدار میں لانے کی پہلی منصوبہ بندی اور مالی تعاون اس حوالے سے برطانیہ نے کیا تھا‘ انہوں نے کافی بڑی مقدار میں پونڈز وقف کرکے میڈیا کو خریدا تھا جو صدر مرسی کے خلاف کالم لکھتے پھر اس ’’کارخیر‘‘ میں سیکولر اور میرے محبوب اماراتی حکمران شامل ہوگئے تھے، یوں صدر مرسی کو عوام میں معتوب بتایا جارہا اور ان کے عیب و خامیاں کالم نگار مغربی میڈیا میں مسلسل لکھتےجبکہ عرب بادشاہتیں بھی اس ’’کارخیر‘‘ میں شامل کروادی گئیں یوں فلسطینی دوست، اخوانی پروفیسرصدرمحمد مرسی کاخاتمہ ہوا، اخوان معتوب ہوگئی ایک خاکی مصری نیافرعون مسند اقتدار پر براجمان ہوا۔